|
|
Priester zien amtsklaaier (28: 1-29:46)
|
Exodus 28
01Wieder mostoe dien bruier Aäron en zien zeuns bie die kommen loaten. Ik heb heur tou Isrelieten oetkozen om priester veur mie te wezen: Aäron en zien zeuns Nadab, Abihu, Eleazar en Itamar.
02Loat den veur dien bruier Aäron haailege amtsklaaier moaken, dij zien volle glorie zain loaten.
03Bestel bekwoame vaklu dij ik doarveur biezundere goaven geven heb, dij klaaier veur Aäron te moaken. Den kin hai inzegend worden om mie as priester te dainen.
04Veur Aäron en veur elk van zien zeuns mouten zai klaaier moaken: n bòrsttaas, n priesterrok, n overklaid, n beduurd onderklaid, n tulbaand en n baand-om-zied, om mie zo as priester te dainen.
05Doar binnen zai golddroad veur neudeg, blaauwsangen, roodsangen en helderrode wol en fienweefd linnen.
06Priesterrok mout deur n kunstenoar vakkundeg moakt worden mit golddroad, blaauwsangen, roodsangen en helderrode wol en fienweefd linnen.
07Op scholders mouten twij zelen baaide stokken, veurpaand en achterpaand, aan nkander holden.
08Baand-om-zied mout van t aigenste materioal wezen en even kunsteg moakt worden.
09In twij onixstainen mout ie wieder noamen zetten van Jakob zien zeuns,
10 in elke stain zès noamen, van d'oldste òf aan.
11 Loat dij noamen doarin graveren zo as zegels graveerd worden, en loat dij stainen den in gold zetten.
12 Dij baaide stainen mouten aan scholderbanden van priesterrok vastzet worden. Op dij menaaier brengt Aäron mie ieder bòt stammen van Israël weer in gedachten.
13-14 As ie baaide stainen in golden randen zet hebben, mout ie doar twij ketjes van vlochten zuver golddroad aan vastmoaken.
15 Wieder mout ie zo kunsteg meugelk n bòrsttaas-veur-t-gericht moaken loaten. Net zo as priesterrok mout dij ook moakt worden van blaauwsangen, roodsangen en helderrode wol en van fienweefd linnen.
16 Dij taas mout vaaierkanteg en dubbeldvòllen wezen: n handbred laank en n handbred braid.
17 Dij mout ie den versieren mit vaaier rieg edelstainen: n robijn, n topaas en n smaragd in eerste rieg;
18 n karbonkel, n saffier en n jaspis in twijde rieg;
19 in daarde rieg n barnstain, n agaat en n amethist;
20 in leste rieg n chrysoliet, n kerlien en n onyx. Ale stainen mouten in golden randen zet worden.
21 Loat in elk van dij twaalf stainen noam van ain van Jakob zien zeuns graveren, zo as in n zegel, n stain veur elk van de twaalf stammen.
22 Vlecht veur dij bòrsttaas ketjes van zuver golddroad en moak dij vaast.
23 Zet doarveur aan bovenkaant van bòrsttaas twij ringen op baaide houken.
24 Dij twij ketjes mout ie mit ain èn vastmoaken aan dizze ringen.
25 Mit t aander èn mout ie dij ketjes aan de golden randen vastzetten dij ie aan veurkaant op scholderzelen van priesterrok vastmoakt hebben.
26 Wieder mout ie nog twij ringen moaken en dij onder aan baaide houken van bòrsttaas vastzetten, aan achterkaant doar dij tegen priesterrok aanhangt.
27 Moak den ook nog twij golden ringen aan priesterrok vaast, aan veurkaant vlak boven baand-om-zied.
28 Hoal den n blaauwsangen koor deur dij ringen hèn en strik bòrsttaas en priesterrok zo aan nkander, dat bòrsttaas nait verschoeven kin.
29 Op dij menaaier dragt Aäron noamen van Israël zien zeuns op dij-bòrsttaas-van-t haaileg-gericht en op zien haart om heur bie mie in gedachten te brengen, ieder bòt as hai tou t haaileg stee ingaait.
30 In dij bòrsttaas mout ie de twij haailege stainen-van-t gericht stoppen dat dij bie Aäron op t haart liggen as e mie in t haaileg stee onder ogen komt. As Aäron in mien tegenwoordeghaid is, mout hai t goddelk gericht veur Isrelieten hailtied op t haart droagen.
31 Overklaid over priesterrok mout ie van ain lap blaauwsangen stof moaken.
32 Midden in dij lap mout n haalsgat zitten doar kop deur kin, om dat gat tou mout n boor-tegen-t-oetscheuren zitten, kunsteg weefd, net as bie n woapenrok.
33 Zeum van mantel mout versierd worden mit blaauwsangen, roodsangen en rode grenoatappels en golden bèltjes,
34 appels en bèltjes om en om aan haile zeum.
35 Aäron mout dat klaid aanhebben as e dainst het. Den kin men dij bèltjes ja heuren as e t haaileg stee onder mien ogen binnenkomt en weer oetgaait. Den zel e nait omkommen.
36 Wieder mout ie n bloum van zuver gold moaken. Doarin mout ie net as in n zegel graveren: 'Haailegd veur de HEER'.
37 Dij bloum mout ie mit n blaauwsangen koor vastmoaken aan veurkaant van tulbaand.
38 Aäron mout dij spreuk op zien veurheufd droagen. Zo zel hai t kwoad votdoun as d'Isrelieten zok bie t ovvern nait aan veurschriften holden hebben. Hai mout dij spreuk hailtied droagen, zodat ik heur ovvers aanveerden kin.
39 Wieder mout ie nog n mooi beduurd onderklaid moaken, n tulbaand van fienweefd linnen en n baand-om-zied van bont beduurwaark.
40 Veur Aäron en zien zeuns mout ie ook zokse onderklaaier moaken, mit n baand-om-zied en tulbanden, tot heur eer en glorie.
41 Dij klaaier mostoe dien bruier Aäron en zien zeuns aantrekken. Most heur zaalven, heur as priester aanstellen en heur inzegen, zodat zai mie in t priesteramt dainen kinnen.
42 Moak veur heur ook linnen ondergoud, van heur zied òf tot over heur billen, om heur schoamte te bedekken.
43 Aäron en zien zeuns mouten dij klaaier aanhebben as ze tabbernoakel ingoan of as ze dainst hebben bie t altoar op t haaileg stee, den hebben ze gain schuld, den huiven ze nait om te kommen. Dij regel geldt veur Aäron en aal zien noazoaten, veur aiweg en aaltied.
|
Exodus 29
01Om Aäron en zien zeuns in te zegen as priester, mostoe t volgende doun: zuik die n jong boltje oet en twij geve rammen.
02Bak die ongerezen brood en ongerezen kouken, dikke en pladde kouken mit eulie kloarmoakt en bestreken, ales van t beste waaitenmeel.
03Dou ze in n körf en breng ze geliek mit t boltje en baaide rammen hierheer.
04Loat Aäron en zien zeuns noar ingang van tabbernoakel kommen en wask heur mit wotter.
05Den mostoe Aäron zien priesterklaaier aantrekken: t beduurde onderklaid, t laange overklaid, zien priesterschoet en zien bòrsttaas, en bind hom zien baand om zied.
06Zet hom zien tulbaand op en moak golden bloum doaraan vaast.
07Krieg die den zaalfeulie en gait dat over hom hèn. Zo mostoe hom zaalven.
08Wieder mostoe zien zeuns dichterbie kommen loaten en heur priesterklaaier aantrekken.
09Bind Aäron en zien zeuns baand om zied en zet heur tulbaand op. Zo worden zai mit heur haile noageslacht inzegend as priester, veur aiweg en aaltied. Zo worden zai rechtegd om ovvers op te droagen.
10 Breng den dat boltje veur tabbernoakel en loat Aäron en zien zeuns heur handen op daaier zien kop leggen.
11 Den mostoe t boltje slachten veur ingang van tabbernoakel, veur mien ogen.
12 Krieg wat van bol zien bloud en striek dat mit dien vingers aan hoorns van t altoar. Aal t aander bloud most onder tegen t altoar aan gaiten.
13 Wieder mostoe aal t plokvet, ook van lever en baaide nieren, op t altoar leggen en in rook opgoan loaten.
14 t Vlaais van t boltje, zien hoed en ingewanden mit aal wat ter in zit, mostoe boeten t legerkaamp verbranden, t is n ovver veur joen zunden.
15 Den mostoe ain van baaide rammen pakken en Aäron en zien zeuns mouten heur handen op kop van t daaier leggen.
16 Most ram slachten, zien bloud opvangen en dat over t altoar hèn sprenkeln.
17 Den most ram ofhaauwen, zien ingewanden en poten schoonmoaken en dij bie kop en aander stokken leggen.
18 Haile ram most den op t altoar aansteken en opbranden. Dat is n brandovver veur mie, de HEER, dat zel mie deugd doun.
19 Den most aander ram kriegen en Aäron en zien zeuns mouten weer heur handen op daaier zien kop leggen.
20 Dij ram most ook slachten en n beetje van zien bloud bie Aäron en zien zeuns aan heur rechter oorlèl strieken, aan heur rechter doem en aan dikke toon van heur rechtervout. Aal t aander bloud mostoe rondom over t altoar hèn sprenkeln.
21 Krieg wat van dat bloud van t altoar mit wat zaalfeulie en besprenkel Aäron en zien zeuns en heur klaaier doarmit: zo binnen dij den veur mie haailegd.
22 Wieder mostoe t vet van dij ram kriegen, dij ram is ja bestemd as ovver bie t inzegen. Neem aal zien plokvet van lever en baaide nieren en ook van steertkwab, en neem ook zien rechter schenkel.
23 Krieg n dik brood en n kouk mit eulie bestreken en n pladde ronde kouk tou körf mit ongerezen brood oet dij veur mie staait.
24 Leg dat aalmoal op handen van Aäron en zien zeuns en loat heur mie dat as n ovver aanbaiden.
25 Den mostoe t weer oet heur handen overnemen en t aansteken op t altoar, tougelieks mit t brandovver, dat t lekker roeken gaait; zo'n ovver is n vuurovver veur mie.
26 Neem den t bòrststok van twijde ram, dij van inzegen van Aäron, en baid mie dat op dien handen as n ovver aan. Dat komt die tou.
27 Hol bòrststok en schenkel van dij ram apaart van aal t aander.
28 Dat dail mouten Isrelieten aan Aäron en zien zeuns ofstoan, t komt heur tou, t is n recht veur nou en veur aaid: t is t haaileg dail van slachterij van Isrelieten dat veur mie apaart holden is.
29 As Aäron oet tied komt, goan zien priesterklaaier op zien zeuns over: in dij klaaier mouten zai ook weer zaalfd en inzegend worden.
30 Zeun dij hom opvolgt en tabbernoakel ingaait om dainst te doun op t haaileg stee, mout dij klaaier zeuven doagen achternkander aanhebben.
31 In t lest mostoe aal t aander vlaais van twijde ram op n haaileg stee koken.
32 Aäron en zien zeuns mouten dat vlaais en t brood oet körf bie ingang van tabbernoakel opeten.
33 Allenneg zai maggen der van eten, omdat zai bie heur inzegen as priester bie mie kommen binnen en ik bie heur. Mor n aander mag der nait van eten, omreden t is haaileg.
34 As ter wat van t vlaais en van t brood tot aanderdoagsmörgens overblift, mout ie dat verbranden, t mag nait opeten worden, want t is haaileg.
35 Doe most mit Aäron en zien zeuns ales persies zo doun as ik joe besteld heb. Zeuven doagen laank mout dij inzegen tot priester duren.
36 Elke dag weer mout ie n boltje slachten as oflözzen van schuld. t Altoar mout ie noar plechteg veurschrift zuvern en mit zaalfeulie inzegen.
37 Zeuven doagen mout ie dat doun, elke dag vannijs. Op dij menaaier wordt t altoar zo haaileg, dat elk dij der aankomt haailegd wezen zel.
38 Aaltied deur mout ie steevaast elke dag twij ainjoarege lammer ovvern.
39 t Aine laam mout ie smörgensvroug slachten en t aander in twijdonkern.
40 Bie t aine laam heurt n tiende dail waaitenmeel, aanmongen mit n kaan van de beste olieveneulie, en n wienovver van n kaan wien.
41 t Twijde laam mout ie tegen oavendstied slachten mit net zo'n meelovver en wienovver as smörgens. n Ovver dat zo lekker rokt, zel mie deugd doun.
42 Zo'n brandovver zel aaltied deur, van older op older, veur mien ogen bie ingang van tabbernoakel aan mie opdroagen worden. Doar zel ik bie joe kommen om mit joe te proaten.
43 Doar zel ik aan d'Isrelieten verschienen en doarom zel dat stee haaileg wezen.
44 Doarom zel ik tabbernoakel en altoar haailegen en ook Aäron en zien zeuns, dat zai as priester veur mie heur waark doun kinnen.
45 Ik zel middenmaank Isrelieten wonen en as heur God bie heur wezen.
46 Den zellen ze gewoarworden dat ik de HEER, heur God, bin dij heur tou Egypte oetbrocht het om middenmaank heur te wonen. Ik bin de HEER, heur God.
|
|
